உலக அளவில் பெரிய பொருளாதார நாடுகளின் பட்டியலில் 4வது இடத்தில் இருந்துவந்த இந்தியா தற்போது எந்த இடத்தில் இருக்கிறது தெரியுமா?
2025ஆம் ஆண்டில் உலக நாடுகளின் பொருளாதார மதிப்பீடு தரவரிசைப் பட்டியலை சர்வதேச நாணய நிதியம் வெளியிட்டுள்ளது. இந்தப் பட்டியலில், 30.8 டிரில்லியன் டாலர் பொருளாதாரத்துடன் அமெரிக்கா தொடர்ந்து முதலிடத்தில் இருந்துவருகிறது.
கடந்த ஆண்டு உலக நாடுகளின் பொருளாதார மதிப்பீடு தரவரிசைப் பட்டியலில் இந்தியா3.92 டிரில்லியன் டாலர் பொருளாதாரத்துடன், முதல் முறையாக நான்காவது இடத்தில் இடம் பெற்றது.
இந்நிலையில், தற்போது சர்வதேச நாணய நிதியம் வெளியிட்டுள்ள சர்வதேச அளவில் பெரிய பொருளாதார நாடுகளின் பட்டியலில் 4ஆவது இடத்தில் இருந்துவந்த இந்தியா 6ஆவது இடத்திற்கு சரிந்துள்ளது. இதற்கு என்ன காரணம்?
உலகளாவிய மொத்த உள்நாட்டு உற்பத்தி (GDP) ஒப்பீடுகள் டாலர் மதிப்பின் அடிப்படையிலேயே கணக்கிடப்படுகின்றன. இந்நிலையில், அமெரிக்க டாலரின் வலுவான நிலை, அமெரிக்க வட்டி விகிதங்களின் உயர்வு மற்றும் மேற்கு ஆசியப் பிராந்தியத்தில் நிலவும் பதற்றங்கள் சார்ந்த தொடர் உலகளாவிய நிச்சயமற்ற சூழல் ஆகியவற்றின் காரணமாக இந்திய ரூபாய் தொடர்ந்து அழுத்தத்திற்கு உள்ளாகி வருகிறது.
இந்தச் சூழலில், 2024-இல் ஒரு டாலருக்கு சுமார் 84.6 ஆக இருந்த ரூபாயின் மதிப்பு, 2025-இல் சுமார் 88.5 ஆகப் பலவீனமடைந்திருப்பதாக IMF தரவுகள் சுட்டிக்காட்டுகின்றன.
இதனால் 2028ஆம் ஆண்டுக்குள் 3ஆவது பெரிய பொருளாதாரமாக மாறும் மத்திய அரசின் குறிக்கோள் 2032ஆக தாமதமாகும் எனக் கூறப்படுகிறது.
அதேசமயம், சர்வதேச நாணய நிதியம், அடுத்த ஆண்டிற்குள் அதாவது 2027க்குள் மீண்டும் இந்தியா 4ஆவது இடத்தைப் பிடிக்கும் என்றும் எதிர்பார்க்கப்படுகிறது.
