மக்கள்தொகை அதிகரிப்பது ஒரு நாட்டுக்கு பெரிய மனிதவள ஆதாரத்தை அளித்தாலும், வேலைவாய்ப்பு, உணவு, வீடு, சாலை, மருத்துவம் போன்ற உள்கட்டமைப்புகளை ஏற்படுத்துவதில் பல சவால்களையும் உருவாக்குகிறது. இந்த அதிகமான மக்கள்தொகையை சரியாக பயன்படுத்தி, நாட்டின் வளர்ச்சிக்கான ஒரு வலிமையான சக்தியாக மாற்றுவதே இப்போது மிகப் பெரிய சவாலாக இருக்கிறது.
ஒரு காலத்தில் சீனாவே உலகில் அதிக மக்கள் உள்ள நாடாக இருந்தது. இப்போது நிலை மாறிவிட்டது. ஐ.நா.வின் சமீபத்திய தகவல்படி, சீனாவை முந்தி இந்தியா தான் உலகில் அதிக மக்கள்தொகை கொண்ட நாடாக அதிகாரப்பூர்வமாக அறிவிக்கப்பட்டுள்ளது. இன்று உலகில் இருக்கும் ஒவ்வொரு 100 பேரில் சுமார் 18 பேர் இந்தியர்கள் என்பதும் ஒரு முக்கியமான விஷயம். அதனால், இந்தியாவுடன் சேர்த்து உலகில் அதிக மக்கள் உள்ள முதல் 10 நாடுகள் எவை? அந்த நாடுகள் என்ன, எங்கு இருக்கின்றன என்பதைக் குறித்து சில சுவாரஸ்யமான தகவல்கள் இதோ…
இந்தியா: இப்போது உலகில் அதிக மக்கள் வசிக்கும் நாடு இந்தியா. இங்கு 143 கோடிக்கும் (1.43 billion) மேல் மக்கள் இருப்பதாக கணிக்கப்பட்டுள்ளது. இந்தியாவின் மக்கள்தொகை பல்வேறு தன்மையுடையது; பல மொழி, பல கலாச்சாரம், பல மதத்தைச் சேர்ந்தவர்கள் இங்கு ஒன்றாக வாழ்கிறார்கள். இந்த அளவுக்கு அதிகமான மக்கள் இருப்பதால், இந்தியாவுக்கு பெரிய சந்தை, வேலைவாய்ப்பு போன்ற துறைகளில் அதிக வாய்ப்புகள் உள்ளன.
சீனா: பல ஆண்டுகளாக உலகில் அதிக மக்கள் உள்ள நாடாக இருந்த சீனா, மக்கள்தொகை கட்டுப்பாட்டு கொள்கைகளின் காரணமாக இப்போது இரண்டாவது இடத்துக்கு வந்துள்ளது. தற்போது சீனாவில் 141 கோடிக்கும் (1.41 billion) மேல் மக்கள் இருப்பதாக மதிப்பிடப்பட்டுள்ளது. சீனாவில் பல வருடங்கள் “ஒரு குழந்தை” கொள்கை நடைமுறையில் இருந்தது என்பது குறிப்பிடதக்கது.
அமெரிக்கா: சுமார் 34 கோடி (340 million) மக்கள் கொண்ட அமெரிக்கா மூன்றாவது இடத்தில் உள்ளது. வலுவான பொருளாதாரத்தைக் கொண்ட இந்த நாட்டில், பல்வேறு நாடுகளைச் சேர்ந்த மக்கள் குடியேறி வாழ்கிறார்கள். அமெரிக்காவின் மக்கள்தொகையில் குடியேறிவந்தவர்களின் பங்கு மிகவும் முக்கியமானது.
இந்தோனேசியா: சுமார் 28 கோடி (280 million) மக்கள்தொகையுடன் இந்தோனேசியா நான்காவது இடத்தில் உள்ளது. இது தென்கிழக்கு ஆசியாவில் உள்ள தீவுகளால் ஆன நாடு; மக்கள்தொகை அடிப்படையில் மிகவும் முக்கியமான நாடாகும்.
பாகிஸ்தான்: சுமார் 24 கோடி (240 million) மக்கள்தொகையுடன் பாகிஸ்தான் ஐந்தாவது இடத்தில் உள்ளது. கடந்த சில ஆண்டுகளாக பாகிஸ்தானின் மக்கள்தொகை வேகமாக அதிகரித்துக் கொண்டே வருகிறது.
நைஜீரியா: சுமார் 22 கோடி (220 million) மக்கள் கொண்ட நைஜீரியா, ஆப்பிரிக்காவில் அதிக மக்கள் உள்ள நாட்டாகவும், உலக வரிசையில் ஆறாவது இடத்திலும் உள்ளது. இங்கு மக்கள்தொகை வேகமாக அதிகரித்து வருவதால், எதிர்காலத்தில் நைஜீரியா இன்னும் பெரிய மக்கள்தொகை கொண்ட நாடாக மாறும் வாய்ப்பு உள்ளது.
பிரேசில்: சுமார் 21 கோடி (210 million) மக்கள்தொகையுடன் பிரேசில் ஏழாவது இடத்தில் உள்ளது. தென் அமெரிக்காவின் மிகப்பெரிய நாடான பிரேசில், மக்கள் எண்ணிக்கையிலும், பொருளாதாரத்திலும் முக்கியமான நாடாகும்.
பங்களாதேஷ்: சுமார் 17 கோடி (170 million) மக்கள் கொண்ட பங்களாதேஷ் எட்டாவது இடத்தில் உள்ளது.
ரஷ்யா: சுமார் 14 கோடி (140 million) மக்கள்தொகையுடன் ரஷ்யா ஒன்பதாவது இடத்தில் உள்ளது. நிலப்பரப்பு மிகப் பெரிய நாடாக இருந்தாலும், அதற்கேற்ப மக்கள்தொகை குறைவாகவே உள்ளது.
மெக்சிகோ: சுமார் 13 கோடி (130 million) மக்கள் கொண்ட மெக்சிகோ, உலகில் அதிக மக்கள்தொகை கொண்ட நாடுகளில் பத்தாவது இடத்தில் உள்ளது. வட அமெரிக்காவின் முக்கிய நாடான மெக்சிகோவில் நகரமயமாக்கல் (urbanisation) வேகமாக வளர்ந்து வருகிறது.
