பிக்பாஸ் சீசன்1ல் பங்கேற்று, வெற்றி பெற்ற ஆரவ் ஹீரோவாக நடிக்கும் படம் ‘ராஜபீமா’. இதில் அதே சீசனில் பங்கேற்று பரபரப்பை ஏற்படுத்திய ஓவியா ஒரு பாடலுக்கு ஆடியிருக்கிறார். பிக்பாஸ் சீசன் 2 போட்டியாளரான யாஷிகாஆனந்த் முக்கியமான வேடத்தில் வருகிறார். நரேஷ் சம்பத் இயக்கியிருக்கிறார்.
தியேட்டர் அதிபர் நாசர் மகன் ஆரவ். சின்ன வயதில் இருந்தே ஒரு யானையை வளர்க்கிறார். அவருக்கும் வனவிலங்குகளை சட்டவிரோதமாக கடத்தும் வில்லனுக்கும் பகை வருகிறது. அந்த சமயத்தில் ஆரவ் ஆசையாக வளர்த்த யானை காணாமல் போகிறது. அந்த ஏரியா மந்திரியான கே.எஸ்.ரவிக்குமார் தனது பதவி நீடிக்க, ஒரு யாகம் நடத்தி யானையை பலியிட நினைக்கிறார். அது நடந்ததா? யானையை காப்பாற்ற எப்படி போராடுகிறார் ஹீரோ என்பது ராஜபீமா கதை.
தமிழில் எம்ஜிஆர் நடித்த நல்ல நேரம், ரஜினி நடித்த அன்னை ஓர் ஆலயம், விக்ரம் பிரபுவின் கும்கி போன்றவை யானையை மையமாகக்கொண்டு வந்த தமிழ் படங்கள். இந்த படங்கள் வெற்றியும் பெற்றன. அந்தவகையில் நீண்ட காலத்துக்குபின் யானை பின்னணியில் ராஜபீமா படம் வந்துள்ளது. இந்த படத்தில் ஒரு பாடலுக்கு கவர்ச்சி ஆட்டம் ஆடியிருக்கிறார் ஓவியா. அவரும் பல ஆண்டுகளுக்குபின் திரையில் வந்துள்ளார். இன்னொரு பிக்பாஸ் போட்டியாளரான யாஷிகாஆனந்த் கவர்ச்சி வேடத்தில் வந்தாலும், அவருக்கு ஒரு சஸ்பென்ஸ் கேரக்டர். ஆஷிமா ஹீரோயின். கே.எஸ்.ரவிக்குமார் அடாவடி மகனாக யோகிபாபு நடித்துள்ளார்.
யானை சம்பந்தப்பட்ட படம் என்பதால், அந்த யானையை பாடல், ஆக் ஷன் காட்சிகளில் கூட நன்றாக பயன்படுத்தியிருக்கிறார்கள். ஆரம்பத்தில் காமெடி வேடம் மாதிரி தெரிந்தாலும், கிளைமாக்சில் வில்லனாக மாறிவிடுகிறார் கே.எஸ்.ரவிக்குமார். ஹீரோ பெயர் ராஜா. யானையின் பெயர் பீமா. அதனால், படத்தின் தலைப்பு ராஜபீமா.
