பிரபலங்களின் வாழ்க்கை சரித்திரத்தை பயோபிக் ஆக எடுப்பது இப்போது ட்ரெண்ட் ஆகி வருகிறது. இளையராஜவையும் கூட இந்த பயோபிக் மவுசு விட்டுவைக்கவில்லை. இதெல்லாம் வேண்டாமென இருந்தவரை தனுஷ் பேசி பேசி இணங்க வைத்துவிட்டார். இது ஒரு புறம் இருக்கட்டும். அடுத்த விஷயத்திற்கு வருவோம்.
ஸ்ரீதேவியின் வாழ்க்கையையும், திரையுலக பயணத்தையும் ஒரு படமாக எடுக்கலாம் என்று சிலர் யோசித்து இருக்கிறார்கள். இதற்காக போனி கபூரிடமும் தங்களது ஆர்வத்தைப் பற்றி கூறியிருக்கிறார்கள்.
அவர்கள் சொன்னதை எல்லாம் பொறுமையாக கேட்ட போனிகபூர், ‘இந்த மாதிரி முயற்சிகளையெல்லாம் என்னால் பொறுத்து கொள்ளமுடியாது. என் மனைவியின் பயோபிக்கை எடுக்க நான் ஒரு நாளும் அனுமதிக்க மாட்டேன்.’ என்று மறுத்துவிட்டாராம்.
திரையுலகப் பயணத்தை எடுத்தால் அதில் ஸ்ரீதேவியின் அந்தரங்க வாழ்க்கையையும் கூறியே ஆகவேண்டும். அது தவிர ஸ்ரீதேவி நடித்த போது அவருடன் நடித்த பல நடிகர்கள் இன்று உச்சத்தில் இருக்கிறார்கள். சமூகத்தில் பெரும் புகழோடும், அடையாளத்தோடும் இருக்கிறார்கள். இதனால் அவர்களைப் பற்றி இந்த கதையில் குறிப்பிடாமல் இருக்கமுடியாது.
மேலும் போனிகபூர் திரைப்பட தயாரிப்பில் முனைப்போடு இருந்து வருகிறார். ஸ்ரீதேவி – போனிகபூரின் வாரிசுகளான ஜான்வி கபூர், குஷி கபூர் இருவரும் சினிமாவில் நடித்து வருகிறார்கள். இன்னும் சொல்லப் போனால், ஸ்ரீதேவிக்கு ஜோடியாக நடித்த நடிகர்களின் வாரிசுகளுடனும் நடிக்கும் சந்தர்ப்பங்கள் இருக்கின்றன. அதனால் எதற்கு தேவையில்லாத வம்பில் மாட்டவேண்டுமென போனிகபூர் மறுத்துவிட்டதாக கூறுகிறார்கள்.
ரஜினிக்கு வில்லனா மைக் மோகன்?
ஜெய் பீம் பட இயக்குநர் த.செ. ஞானவேல் இயக்கத்தில் ரஜினி காந்த் நடிக்கும் ‘வேட்டையன்’ பட ஷூட்டிங் முடிவடையும் தருவாயில் இருக்கிறது. ஆனால் அதற்குள்ளாகவே ரஜினியும் லோகேஷ் கனகராஜூவும் இணையவிருக்கும் தலைவர் 171 படம் பற்றிய பரபரப்பு அதிகமாகி வருகிறது.
தலைவர் 171-ன் அசல் பெயர் என்ன என்பதை வருகிற ஏப்ரல் 22-ம் தேதி அதிகாரப்பூர்வமாக அறிவிக்க இருக்கிறார்கள். வழக்கம் போல் ரஜினியின் போஸ்டரை தயார் செய்து விளம்பரப்படுத்தி, ஒரு பேச்சை கிளப்பும் வேலைகளை லோகேஷ் கனகராஜ் ஆரம்பித்துவிட்டார்.
இந்நிலையில் புதிய கிசுகிசு ஒன்று உலா வருகிறது. அது, லோகேஷ் கனகராஜ் ரஜினிக்கு வில்லனாக நடிக்க யாரும் எதிர்பார்க்காத ஒருவரை நடிக்க வைக்க வேண்டுமென யோசித்திருக்கிறாராம். ஆளாளுக்கு பல நடிகர்கள் பெயரைச் சொல்ல, அவரோ மைக் மோகனை நடிக்க வைத்தால் என்ன என்று கேட்டிருக்கிறாராம். இதற்கு அவரது உதவியாளர்கள் மத்தியில் நல்ல வரவேற்பு இருக்கவே, இப்போது மைக் மோகனை அணுகியிருக்கிறார்களாம்.
மைக் மோகனை இப்போது விஜயுடன் நடிக்க வைத்திருக்கிறார் வெங்கட் பிரபு. இது தவிர மைக் மோகனும் இரண்டாவது ரவுண்ட் வந்தே தீரவேண்டுமென தீவிரமாக இயங்கி வருகிறார். இதனால்தான் அவரது ரசிகர் மன்றத்தை ஆங்காங்கே விழாக்கள் நடத்த சொல்லி வருகிறாராம். அவரும் மக்களுக்கு நல உதவிகளை அவ்வப்போது செய்து வருகிறாராம்.
