வாழ்க்கையில் வெற்றி பெற திறமையும் உழைப்பும் மட்டும் போதுமா? என்ற கேள்விக்கு பல வெற்றியாளர்கள் கூறும் பதில் ஒன்றுதான் – “உங்களைச் சுற்றி இருப்பவர்கள்தான் உங்கள் எதிர்காலத்தை வடிவமைக்கிறார்கள்.” திறமை, முயற்சி, ஒழுக்கம் ஆகியவை முக்கியமானவை என்றாலும், நம்மை ஊக்குவிக்கும் நல்ல மனிதர்களின் இருப்பு வெற்றிக்கான மிகப்பெரிய முதலீடாக அமைகிறது.
பிரபல எழுத்தாளர் ஆண்ட்ரூ ஜான் கூறும், “உங்களின் முன்னேற்றம் என்பது உங்கள் கையில் மட்டும் இல்லை; உங்களைச் சுற்றி இருப்பவர்கள் எப்படிப்பட்டவர்கள் என்பதைப் பொறுத்தும் அது தீர்மானிக்கப்படுகிறது” என்ற கருத்து வாழ்க்கையின் ஆழமான உண்மையை எடுத்துக்காட்டுகிறது. நம்மை உற்சாகப்படுத்தும், தன்னம்பிக்கையை வளர்க்கும் மனிதர்களுடன் இருக்கும் போது நமது எண்ணங்களும் செயல்களும் நேர்மறையாக மாறுகின்றன.
பாராட்டும் மனிதர்கள் – தன்னம்பிக்கையின் டானிக்
ஒவ்வொருவரின் வாழ்க்கையிலும் உண்மையாக பாராட்டுபவர்கள் சிலர் இருப்பார்கள். அவர்கள் வெறும் புகழ்ச்சிக்காக பேசுவதில்லை; நமது முயற்சியை உணர்ந்து ஊக்குவிக்கிறார்கள். அத்தகைய வார்த்தைகள் தன்னம்பிக்கையை அதிகரித்து, இன்னும் சிறப்பாக செயல்பட வேண்டும் என்ற உத்வேகத்தை ஏற்படுத்துகின்றன.
சிலர், “புகழ்ச்சிக்கும் பாராட்டுக்கும் அடிமையாகக் கூடாது” என்று கூறுவார்கள். அது உண்மைதான். ஆனால் அதே நேரத்தில், நியாயமான பாராட்டும், மனப்பூர்வமான அங்கீகாரமும் மனிதனை முன்னேற்றும் சக்தியாக செயல்படுகிறது என்பதையும் மறுக்க முடியாது.
எனவே, உண்மையாக பாராட்டுபவர்களையும், வெறும் புகழ்ச்சிக்காக பேசுபவர்களையும் பிரித்தறியும் திறனை வளர்த்துக்கொள்வது மிகவும் அவசியம். அந்த புரிதல் இருந்தால் பாராட்டால் தலைக்கனம் வராது; மாறாக அது முன்னேற்றத்திற்கான ஊக்கமாக மாறும்.
ஒரு ஞானி கூறிய வாழ்க்கைப் பாடம்
ஒரு ஊருக்கு வந்திருந்த ஞானியை, செல்வாக்கு மிக்க ஒருவர் சந்திக்க வந்தார்.
அவரைப் பார்த்த ஞானி, “உங்களுக்கு ஏதேனும் பிரச்சினையா? நான் என்ன உதவி செய்ய வேண்டும்?” என்று கேட்டார்.
அதற்கு அவர், “எனக்கு எந்தப் பிரச்சினையும் இல்லை. முன்பு பல கஷ்டங்களை சந்தித்தேன். இன்று வாழ்க்கையில் முன்னேறி மகிழ்ச்சியாக இருக்கிறேன். இந்த நிலையை அருளிய கடவுளுக்கு நன்றி சொல்ல வேண்டும். அதற்காக என்ன செய்ய வேண்டும் என்பதை அறிய வந்துள்ளேன்,” என்றார்.
அதை அமைதியாகக் கேட்ட ஞானி கூறிய பதில் அனைவருக்கும் ஒரு சிறந்த வாழ்க்கைப் பாடமாக அமைந்தது.
“உங்கள் முன்னேற்றத்திற்காக முதலில் கடவுளுக்கு நன்றி சொல்ல வேண்டியதில்லை. மாறாக, ‘நீங்கள் நன்றாக இருக்க வேண்டும்’ என்று மனதார வாழ்த்திய நல்ல உள்ளங்களுக்கு நன்றி சொல்லுங்கள். அவர்கள் கூறிய நேர்மறையான வார்த்தைகளும், உங்களை நம்பிய நம்பிக்கையும் தான் இன்று நீங்கள் இந்த நிலையை அடைய காரணம்.”
இந்தச் சிறிய சம்பவம் ஒரு பெரிய உண்மையை உணர்த்துகிறது. நம்மை நம்பும் மனிதர்களின் நம்பிக்கையே பல நேரங்களில் நம்முடைய வெற்றிக்கான அடித்தளமாக அமைகிறது.
நல்ல நட்பு – வாழ்க்கையை மாற்றும் முதலீடு
“நல்ல நண்பர்களுடன் பழக வேண்டும்” என்று பெற்றோர்கள் அடிக்கடி கூறுவது வெறும் அறிவுரை அல்ல; வாழ்க்கை அனுபவத்தில் இருந்து வந்த உண்மை.
நம்மைச் சுற்றி நேர்மறை எண்ணம் கொண்டவர்கள் இருந்தால், அவர்கள் நமது வெற்றியை பார்த்து பொறாமைப்பட மாட்டார்கள். மாறாக, நமது வளர்ச்சியில் மகிழ்ச்சி அடைவார்கள். தவறு செய்தால் திருத்திக் கூறுவார்கள். வெற்றி பெற்றால் மனதார பாராட்டுவார்கள்.
இத்தகைய உறவுகள்தான் வாழ்க்கையில் தொடர்ந்து முன்னேற உதவுகின்றன. ஏனெனில் அவர்கள் நமக்குள் இருக்கும் திறமையை வெளிக்கொண்டு வர உதவுகிறார்கள்.
தோல்வியை வெல்லும் நேர்மறை சிந்தனை
வாழ்க்கையில் தோல்வி என்பது தவிர்க்க முடியாத ஒன்று. ஆனால், தோல்விக்குப் பிறகு மீண்டும் எழுந்து நிற்க வைப்பது நேர்மறை சிந்தனையே.
மனச்சோர்வுடன் இருக்கும் தருணங்களில், “உன்னால் முடியும்”, “மீண்டும் முயற்சி செய்”, “இந்த தோல்வி நிரந்தரமல்ல” என்று கூறும் ஒரு மனிதர் நம் அருகில் இருந்தாலே நமக்குள் புதிய உற்சாகம் பிறக்கிறது.
அந்த ஒரு வார்த்தை பல நேரங்களில் வாழ்க்கையை மாற்றும் சக்தி கொண்டதாக இருக்கும்.
இதனால்தான், “தோல்விகள் நேர்மறை சிந்தனை கொண்டவர்களின் அருகில் கூட நெருங்குவதில்லை” என்று கூறப்படுகிறது. ஏனெனில் அவர்கள் ஒவ்வொரு சவாலையும் ஒரு புதிய வாய்ப்பாகவே பார்க்கிறார்கள்.
எதிர்மறை எண்ணங்கள் – வளர்ச்சியின் மறைமுக எதிரி
மறுபுறம், எப்போதும் குறை கூறிக்கொண்டே இருப்பவர்கள் நம்முடைய மனநிலையையும் பாதிக்கிறார்கள்.
“உனக்கு எல்லாம் நல்லா நடக்குது…”, “எனக்கு மட்டும் பிரச்சினைதான்…”, “எதுவும் சரியாக போவதில்லை…” போன்ற எதிர்மறை பேச்சுகள், கேட்பவரின் மனதிலும் சோர்வை உருவாக்கும்.
இத்தகைய எண்ணங்கள் மெதுவாக நமது தன்னம்பிக்கையை குறைத்து, முயற்சிக்கும் மனநிலையையே பாதிக்கக்கூடும். அதனால், எப்போதும் எதிர்மறையாக பேசுபவர்களிடமிருந்து சற்று விலகி இருப்பது மனநலத்திற்கும், வளர்ச்சிக்கும் நல்லது.
வெற்றிக்கு வழிகாட்டும் உறவுகளை தேர்வு செய்யுங்கள்
வாழ்க்கையில் நாம் தேர்ந்தெடுக்கும் நண்பர்கள், வழிகாட்டிகள் மற்றும் நெருங்கிய உறவுகள் நமது எதிர்காலத்தை தீர்மானிக்கின்றன. நம்மை ஊக்குவிக்கும், தவறுகளை சுட்டிக்காட்டும், வெற்றிக்காக உற்சாகப்படுத்தும் மனிதர்களை நம்மோடு வைத்துக்கொள்வதே புத்திசாலித்தனமான முடிவு.
அதே நேரத்தில், ஒவ்வொரு பாராட்டையும் ஏற்றுக்கொள்வதற்கு முன் அது உண்மையான அங்கீகாரமா அல்லது வெறும் புகழ்ச்சியா என்பதை ஆராயும் விழிப்புணர்வும் அவசியம்.
வெற்றி என்பது தனியாக அடையப்படும் பயணம் அல்ல. நம்மை நம்பி ஊக்குவிக்கும் மனிதர்கள், நேர்மறையான வார்த்தைகள், உற்சாகமூட்டும் சூழல் ஆகியவை இணைந்தால்தான் ஒரு மனிதன் முழுமையான வெற்றியை அடைய முடியும்.
எனவே, உங்கள் வாழ்க்கையில் உங்களை உயர்த்திப் பேசும் நல்ல உள்ளங்களை மதியுங்கள். அவர்களின் ஊக்கத்தை சக்தியாக மாற்றுங்கள். நேர்மறை எண்ணங்களுடன் முன்னேறுங்கள்.
ஏனெனில், நேர்மறை சிந்தனை இருக்கும் இடத்தில் தன்னம்பிக்கை வளரும்; தன்னம்பிக்கை வளரும் இடத்தில் வெற்றியும் தோல்வியை வென்றே தீரும்.
