வெள்ள நீர் ஊருக்குள் வருவதை தடுக்க மாநகராட்சி ஒக்கியம் மடுவில் இருந்து தண்ணீர் கடலுக்கு செல்ல புதிய திட்டம் ஒன்றை வைத்து உள்ளது.
சென்னையில் வெள்ளத்தை தடுக்க ₹83 கோடி செலவில் பெரிய வடிகால் கட்டும் பணி தொடங்க உள்ளது. இதன் மூலம் தெற்கு சென்னை பகுதிகளில் வெள்ளம் குறையும். குறிப்பாக பள்ளிக்கரணை, பெரும்பாக்கம், செம்மஞ்சேரி, பெருங்குடி, OMR போன்ற இடங்கள் பயன் பெறும். ஒக்கியம் மடுவுவில் இருந்து நேரடியாக கடலுக்கு தண்ணீர் செல்லும் வகையில் இந்த வடிகால் அமைக்கப்படுகிறது. இதனால் வெள்ள நீர் விரைவாக வெளியேறும்.
இந்த வடிகால் மூலம் 550 கன அடி நீரை கடலுக்கு கொண்டு செல்ல முடியும். இது மூன்று மீட்டர் உயரம் மற்றும் 2.5 மீட்டர் அகலம் கொண்டதாக இருக்கும். வடிகால் ஒக்கியம் மடுவுவில் தொடங்கி, OMR மற்றும் ECR இடையே உள்ள பெத்தேல் நகர் வழியாக செல்லும். பின்னர், இஞ்சம்பாக்கத்தில் உள்ள VGP யுனிவர்சல் கிங்டம் அருகே கிழக்கு கடற்கரை சாலையை கடந்து கடலில் கலக்கும். இதன் நீளம் மூன்று கிலோமீட்டர்.
மாநில பேரிடர் மேலாண்மை துறை ஒருங்கிணைப்பாளர் டி. காந்திமதிநாதன் இது குறித்து பேசினார். “தெற்கு சென்னையில் அடிக்கடி வெள்ளம் வருவதற்கு காரணம், பள்ளிக்கரணை சதுப்பு நிலத்தில் இருந்து ஒக்கியம் மடுவு, பக்கிங்காம் கால்வாய் வழியாக முட்டுக்காடு வரை தண்ணீர் மெதுவாக செல்வதே” என்று அவர் கூறினார். “முட்டுக்காடு முகத்துவாரத்தில் இருந்து கோவளம் கழிமுகம் மூன்று கிலோமீட்டர் தூரத்தில் உள்ளது. கடல் மட்டம் உயரும்போது, கழிமுகத்தில் இருந்து தண்ணீர் வெளியேறுவதில்லை. புதிய வடிகால் நேரத்தை குறைத்து, OMR-ல் இருந்து நேரடியாக தண்ணீரை கடலுக்குள் தள்ளும்” என்று அவர் தெரிவித்தார்.
ஒக்கியம் மடுவு 7,000 கன அடி நீரை கொண்டு செல்லும் திறன் கொண்டது. இது தெற்கு பக்கிங்காம் கால்வாயுடன் இணைகிறது. காந்திமதிநாதன் மேலும் கூறுகையில், “இயற்கை வடிகால் 14 கிலோமீட்டர் நீளம் கொண்டது. கழிமுகங்களின் தன்மை தண்ணீரை தேக்கி வைப்பதே. அதனால் தான் இந்த பகுதிகளில் வெள்ளம் ஏற்படுகிறது. புதிய வடிகால் கடல் மட்டத்தில் இருந்து உயரமாக இருப்பதால், தண்ணீர் வேகமாக செல்லும். குறுகிய தூரம் என்பதால், மழை பெய்யும் போது வேகம் அதிகமாக இருக்கும்” என்றார்.
இதோடு இன்னும் ஆறு வடிகால்கள் வர உள்ளன. இதன் மூலம் கூடுதலாக 3,000 கன அடி நீரை வெளியேற்ற முடியும். இதனால் வெள்ளத்தின் தாக்கம் இன்னும் குறையும். வடிகாலின் சுமார் 50 மீட்டர் தூரம் கடற்கரை பகுதியில் வருவதால், CRZ-1 அனுமதிக்கு WRD விண்ணப்பிக்கும் என்று காந்திமதிநாதன் தெரிவித்தார்.
