தமிழகத்தை சேர்ந்த ‘கண்டுபிடிப்பு’ விஞ்ஞானி ஜி.டி.நாயுடுவின் சாதனைகள், சேவைகளை சொல்லித் தெரிய வேண்டியதில்லை. அவரது வாழ்க்கை வரலாறு குறித்து பல்வேறு புத்தகங்கள் வந்துள்ளன. 1893ல் பிறந்து 1974-ல் காலமான அவரின் சாதனைகள் குறித்து பல்வேறு கட்டுரைகள் வந்துள்ளன. இப்போது அவரது வரலாறு திரைப்படமாக உள்ளது. இதில் ஜி.டி.நாயுடுவாக மாதவன் நடிக்கிறார். கிருஷ்ணகுமார் ராமகுமார் இயக்குகிறார்.
இது குறித்து படக்குழுவினர் கூறியதாவது…
ஜி.டி.நாயுடுவின் வாழ்க்கை வரலாறு படத்தை வர்கீஸ் மூலன் பிக்சர்ஸ் மற்றும் ட்ரைகலர் பிலிம்ஸ் தயாரிக்கிறது. கடந்த 2022-ல் வெளியான தேசிய விருது பெற்ற ’ராக்கெட்ரி: தி நம்பி எஃபெக்ட்’ படத்தில், ராக்கெட் விஞ்ஞானி நம்பி நாராயணனாக மாதவன் நடித்தார். படம் பெரிய வெற்றி பெற்றது. தேசிய விருதும் பெற்றது. அந்த தயாரிப்பு குழு இப்படத்தில் இணைகிறது.
சமீபத்திய ரிலீஸான ‘சைத்தான்’ படத்தில் வித்தியாசமான கேரக்டரில் மாதவன் நடித்தார். இப்போதும் சில படங்களில் மாறுபட்ட வேடங்களில் அவர் நடித்து வருகிறார். அதைத் தொடர்ந்து ஜி.டி.நாயுடுவாக மாதவன் நடிக்க உள்ளார். ‘இந்தியாவின் எடிசன்’ மற்றும் ‘கோயம்புத்தூரின் வெல்த் கிரியேட்டர்’ என்று அழைக்கப்படும் ஜி.டி.நாயுடுவின் வாழ்க்கை வரலாறு படம், இந்திய சினிமாவில் முக்கியமான படமாக அமையும்.
ஜி.டி. நாயுடுவின் பிறந்த இடமான கோயம்புத்தூரில் இந்த மாதம் படப்பிடிப்பு தொடங்குகிறது. ஜெர்மனியிலும் படப்பிடிப்பு நடக்கிறது. முன் தயாரிப்பு பணிகளுக்கே 2 ஆண்டுகள் ஆனது. அவரது வாழ்க்கை வரலாற்றை உண்மைக்கு நெருக்கமாக படமாக்கும் விதமாக ரியல் லொகேஷனில் படப்பிடிப்பு நடத்துகிறோம். படத்தின் டைட்டில் பிப்ரவரி 18-ம் தேதி வெளியிடப்படும். படத்தில் நடிக்கும் மற்ற நடிகர்கள் மற்றும் தொழில்நுட்ப கலைஞர்கள் வரும் நாட்களில் அறிவிக்கப்படுவார்கள்.
இவ்வாறு படக்குழுவினர் கூறினர்.
