சினிமாவில் நட்சத்திரங்களுடைய பணம், பெயர், புகழ், வரவேற்பு எல்லாமே ஒரு கரைப்புரண்டு ஓடும் நதியில் எட்டிப்பார்க்கும் நீர்க்குமிழ் போலதான். எதிர்பாராத நேரத்தில் பூக்கும். அங்கும் இங்கும் எங்கும் பரபரப்பாக ஓடும், பட்டென்று உடைந்து காணாமல் கலந்துவிடும்.

இது புரியாமல் தங்களது சொத்தையும், பணத்தையும் இழந்த நட்சத்திரங்கள் ஏராளம், தமிழ் சினிமாவின் முதல் சூப்பர் ஸ்டார் தியாகராஜ பாகவதர் முதல் கலைவாணர் என்.எஸ். கிருஷ்ணன், சாவித்திரி வரை இந்தப் பட்டியல் பெரிது.

இவர்களது வாழ்க்கையைப் பார்த்து தெரிந்து கொண்ட அடுத்த தலைமுறை நட்சத்திரங்கள் சுதாரித்து கொண்டார்கள். மார்க்கெட் இருக்கும் போதே சம்பாதித்ததை நிலத்திலும், தங்கத்திலும், வணிக வளாகங்கள், திருமண மண்டபங்களில் முதலீடு செய்தார்கள். இவர்களுக்கு அடுத்து தற்போதுள்ள நட்சத்திரங்கள் புதிய தொழில்களில் முதலீடு செய்ய ஆரம்பித்திருக்கிறார்கள். இப்படி பிஸினெஸ்ஸில் கலக்கும் கோலிவுட் ஹீரோயின்களை பற்றி இங்கே பார்க்கலாம்.

சமந்தா

தமிழ், தெலுங்கு சினிமாவில் நயன்தாராவுக்கு அடுத்தப்படியாக பரபரப்பான கிசுகிசுக்கள், ஏடாக்கூடமான சர்ச்சைகளில் சிக்கி வரும் சமந்தா, தனக்கென்று ஒரு அடையாளம் வேண்டுமென நினைப்பவர். இதனால்தான் விவாகரத்தையும் கூட வாங்கி விட்டு, தனது பெயரில் சேர்த்திருந்த முன்னாள் கணவர் நாக சைத்தன்யாவின் குடும்பப் பெயரான அக்கினேனியை கூட நீக்கிவிட்டார்.

இதனால் தனக்கென்று ஒரு பிஸினெஸ் வேண்டுமென இவர் தொடங்கியதுதான் LP ‘Saaki’. இது பெண்களுக்கான ப்ரத்யேக ஆடை ப்ராண்ட் ஆகும். இது தவிர SVS Partners LLP நிறுவனம். தனது நெருங்கிய நண்பர்களுடன் இணைந்து தொடங்கி இருக்கும் இந்நிறுவனம் ஸ்டார் அப் நிறுவனங்களுக்கு முதலீடு செய்து வருகிறது.

தமன்னா

தனது 15-வது வயதிலேயே நடிக்க வந்த தமன்னா தமிழ் மற்றும் தெலுங்குப் படங்களில் அதிகம் நடித்தவர். தொடர்ந்து ஹீரோயினாக நடித்து வந்தாலும், இவருக்கு இப்போது வாய்ப்புகள் அதிகமில்லை. இதனால் வெப் சீரிஸ்கள் பக்கம் கவனம் செலுத்த ஆரம்பித்திருக்கிறார். பலவருடங்கள் முன்னணி ஹீரோயினாக சம்பாதித்ததை பிஸினெஸ்ஸிலும் முதலீடு செய்திருக்கிறார்.

இவர் இன்றைக்கு குண்டூசியை கூட ஆன்லைனில் ஆர்டர் செய்யும் இன்றைய இளையதலைமுறையை நம்பி களத்தில் இறங்கியிருக்கிறார்.. இ-காமர்ஸ் நிறுவனங்கள் எல்லா பொருட்களையும் விற்க, தமன்னாவோ நகைகளை ஆன்லைன் மூலமாக மட்டும் விற்கும் ஆன்லைன் ஜூவல்லரியை 2015-ல் தொடங்கி இருக்கிறார். தமன்னா தொடங்கியிருக்கும் ப்ராண்ட்டின் பெயர் White & Gold. அழகான நகைகளை தமன்னாவிடம் இனி ஆர்டர் கொடுத்து வாங்கலாம்.

ஷ்ருதி ஹாஸன்

கமலின் மகள் என்ற அடையாளம் உள்ளவர். ஆனால் இந்த பின்னணி இவருக்கு அறிமுகம் ஆவதற்கு மட்டுமே ஒரு கைக்கொடுத்தது. சரியான வாய்ப்புகள் வரவில்லை என்றாலும் இவருக்கு சினிமாவை விட இசையில் ஆர்வம் அதிகம். இதனால் நடிக்கும் போதே மியூசிக் பேண்ட், ஆல்பம் என திசை திரும்புவது வழக்கம்.

இதனால் இளையதலைமுறை ஹீரோக்களுக்கு ஜோடியாக நடிப்பதைவிட, சிரஞ்சீவ் நந்தமூரி நபால கிருஷ்ணா மாதிரி தனது அப்பா வயதில் இருக்கும் சீனியர் ஹீரோக்களுக்கும் ஜோடியாக நடித்து வருகிறார்.

ஒரு விஷயத்தில் இவர் மற்ற நடிகைகளிடமிருந்து மாறுபட்டு நிற்கிறார். நகை, துணி மாதிரி சமாச்சாரங்களில் முதலீடு செய்யாமல், Isidro என்னும் பெயரில் சொந்தமாக ப்ரொடக்‌ஷன் ஹவுஸ் வைத்திருக்கிறார்.

இந்நிறுவனம் மூலம் தனது அப்பாவைப் போலவே சினிமா தொடர்பான விஷயங்களில் ஆர்வத்துடன் குறும்படங்கள், அனிமேஷன் படங்கள், வீடியோ ரிக்கார்டிங் தொடர்பான வேலைகளைப் பார்த்து வருகிறார். இந்நிறுவனத்தை இவரது தங்கை அக்‌ஷரா ஹாஸன் கவனித்து கொள்கிறார்.

ஷ்ரேயா சரன்

’மழை’ படம் மூலம் ஜெயம் ரவிக்கு ஜோடியாக அறிமுகமானாலும், அடுத்தப்படத்திலேயே ’சிவாஜியில்’ ரஜினிக்கு ஜோடியாக நடித்தார். அவ்வளவுதான் ஷ்ரேயாவின் மார்க்கெட் படபடவென உச்சத்துக்கு பறந்தது. அப்படியே கொஞ்சம் கொஞ்சமாக வாய்ப்புகள் குறைய சத்தமில்லாமல் திருமணம் செய்து கொண்டார். அதற்கு பிறகுதான் முன்பு இல்லாத வகையில் செகண்ட் ரவுண்டை கவர்ச்சியுடன் ஆரம்பித்திருக்கிறார்.

இன்று திருமணமான பின்னரும் செக்ஸியாக புகைப்படங்களை எடுத்து இணையத்தையே அதிரவைத்து கொண்டிருக்கும் ஷ்ரேயா சரன், மும்பையில் வெல்னெஸ் சென்டர்களையும், ஸ்பாகளையும் நடத்தி வருகிறார். இதில் ஹைலைட்டான விஷயம் என்னவென்றால் இந்த ஸ்பாகளில் வேலை செய்பவர்கள் மாற்று திறனாளிகள். அதாவது இங்குள்ளவர்களுக்கு கண் பார்வை குறைப்பாடு உள்ளவர்கள். இது போன்று இருண்டு போன உலகமாய் பாதிக்கப்பட்டவர்களின் வாழ்க்கையில் வெளிச்சத்தைக் கொடுக்க வேண்டுமென இவற்றை நடத்தி வருகிறார்.

தாப்ஸி

மிகவும் துணிச்சலான நடிகை. கதைகளுக்கு முக்கியத்துவம் கொடுப்பவர். என பெயரெடுத்திருக்கும் தாப்ஸி., ‘தெ வெட்டிங் ஃபேக்டரி’ என்ற பெயரில் திருமண ஏற்பாட்டு நிறுவனம் ஒன்றை நடத்தி வருகிறார்.

தாப்ஸி தமிழ், தெலுங்கு, ஹிந்தி என பல மொழிகளில் நடித்துவருவதால், இந்நிறுவனத்தை கவனிக்கும் பொறுப்பை தனது தங்கை சாகுன் பன்னு மற்றும் தோழி ஃபரா பர்வேஷ் ஆகிய் இருவரிடம் ஒப்படைத்திருக்கிறார்.

காஜல் அகர்வால்

2004-ம் ஆண்டிலேயே நடிக்க வந்துவிட்டார் காஜல் அகர்வால். இதனால் சீக்கிரமே இவரை சீனியர் ஹீரோயின் என்று கட்டம் கட்டிவிட்டார்கள். சுதாரித்து கொண்ட காஜல் அகர்வால், தனது தங்கையும் நடிகையுமான நிஷா அகர்வாலுடன் சேர்ந்து ‘Marsala’ என்ற ப்ராண்டில் ‘ஆன்லைன் ஜூவல்லரியை தொடங்கி விட்டார்.

ஆன்லைன் ஜூவல்லரி என்றாலும் மும்பையில் இவரது ப்ராண்ட்டுக்கு ஒரு விற்பனை நிலையம் உள்ளது. தங்க நகைகள் இவரது ஜூவல்லரி ரொம்ப பிரபலம். இதற்கிடையைல் காஜலுக்கு திருமணமும் ஆக தனது கணவருடன் சேர்ந்து வீட்டு அலங்காரப் பொருட்கள் பிஸினெஸ்ஸிலும் இப்போது பிஸியாகி இருக்கிறார்.

இவர்களைப் பார்த்து, சினிமாவை தாண்டி பிஸினெஸ்ஸில் முதலீடு செய்ய ஆரம்பித்திருக்கும் நடிகைகளின் பட்டியல் நீண்டு கொண்டே போகிறது. இனி மார்க்கெட் இல்லையென்றால் கூட நகை கடையிலோ, புடவை கடையிலோ, உட்கார்ந்து கொண்டு சொந்தமாக, மனநிம்மதியுடன் வாழலாம் என்ற இவர்களது பக்குவம் பாராட்டுக்குரியதே.