சென்னையில் அடுத்த 3 நாட்களுக்கு கனமழை பெய்ய வாய்ப்பு உள்ளதாக வானிலை மையம் தெரிவித்துள்ளது. இந்த கனமழையைத் தரும் என எதிர்பார்க்கப்படும் காற்றழுத்தம் தற்போது எங்கு உள்ளது, எப்படி நகரும், எந்த மாவட்டங்களில் கனமழை பெய்ய வாய்ப்பு உள்ளது என்பதை விரிவாக பார்ப்போம்.
இந்த வருடம் வடமேற்கு பருவமழை தொடங்கிய பிறகு இரண்டு பெரிய மழைகளை தமிழ்நாடு சந்தித்துள்ளது. இதில் முதல் மழையில் விழுப்புரம், திருவண்ணாமலை, கிருஷ்ணகிரி உட்பட வடமாவட்டங்கள் கடுமையாக பாதிக்கப்பட்டன. இரண்டாவது மழையில் திருநெல்வேலி, தூத்துக்குடி, தென்காசி மாவட்டங்களில் சில பகுதிகள் கடுமையாக பாதிக்கப்பட்டன. இந்நிலையில், தற்போது இந்த வருடத்தின் மூன்றாவது பெரிய மழையை தமிழ்நாடு சந்திக்க உள்ளதாக வானிலை ஆய்வாளர்கள் தெரிவித்து வருகின்றனர்.
இதனிடையே, தென்மேற்கு வங்கக்கடல் பகுதிகளில் தற்போது நிலவும் காற்றழுத்த தாழ்வு பகுதி, அடுத்த இரு தினங்களில், மேலும் வலுப்பெற்று, மேற்கு வடமேற்கு திசையில், தமிழக கடலோரப் பகுதிகளை நோக்கி நகரக் கூடும் என வானிலை மையம் கணித்துள்ளது. அதாவது, காற்றழுத்த தாழ்வுப்பகுதியானது, சென்னை கடல் பகுதியை ஒட்டி வந்து, வடக்கு நோக்கி நகர கூடும் என வானிலை வட்டாரங்கள் தகவல் தெரிவிக்கின்றன.
சென்னையைப் பொறுத்தவரைக்கும் அடுத்த 24 மணி நேரத்திற்கு வானம் பொதுவாக மேகமூட்டத்துடன் காணப்படும், நகரில் ஒரு சில இடங்களில் இடி-மின்னலுடன் கூடிய மிதமான கனமழை பெய்யக்கூடும். அதிகபட்ச வெப்பநிலை 28 டிகிரி செல்சியஸை ஒட்டியும் குறைந்தபட்ச வெப்பநிலை 23-24 டிகிரி செல்சியஸை ஒட்டியும் இருக்கக்கூடும் என வானிலை மையம் சார்பில் தெரிவிக்கப்பட்டுள்ளது.
மேலும், “இன்று (17.12.2024) வட கடலோர தமிழகத்தில் அநேக இடங்களிலும் இதர தமிழகத்தில் ஒரு சில இடங்களிலும் புதுவை மற்றும் காரைக்கால் பகுதிகளிலும் இடி, மின்னலுடன் கூடிய லேசானது முதல் மிதமான மழை பெய்யக்கூடும். குறிப்பாக சென்னை செங்கல்பட்டு, திருவள்ளூர், காஞ்சிபுரம், விழுப்புரம் மற்றும் கடலூர் ஆகிய மாவட்டங்களில் ஓரிரு இடங்களில் மற்றும் புதுவையில் கனமழை பெய்ய வாய்ப்புள்ளதாக வானிலை மையம் தெரிவித்துள்ளது.
நாளை (18.12.2024) வட கடலோர தமிழகத்தில் அநேக இடங்களில், இதர தமிழகத்தில் ஒரு சில இடங்களிலும் புதுவை மற்றும் காரைக்கால் பகுதிகளிலும் இடி மின்னலுடன் கூடிய லேசானது முதல் மிதமான மழை பெய்யக்கூடும். சென்னை, செங்கல்பட்டு, திருவள்ளூர், காஞ்சிபுரம் மாவட்டங்களில் ஓரிரு இடங்களில் கன முதல் மிக கனமழையும் விழுப்புரம் மற்றும் கடலூர் மாவட்டங்களில் ஓரிரு இடங்களில் மற்றும் புதுவையில் கனமழையும் பெய்ய வாய்ப்புள்ளது
நாளை மறுநாள் (19-12-2024) தமிழகத்தில் ஒரு சில இடங்களிலும் புதுவை மற்றும் காரைக்கால் பகுதிகளிலும் இடி மின்னலுடன் கூடிய லேசானது முதல் மிதமான மழை பெய்யக்கூடும். சென்னை, செங்கல்பட்டு, திருவள்ளூர் மற்றும் காஞ்சிபுரம் மாவட்டங்களில் ஓரிரு இடங்களில் கனமழை பெய்ய வாய்ப்புள்ளது” என்று வானிலை ஆய்வு மையம் தெரிவித்துள்ளது.
